„კიდევ ათეულობით ადამიანის დაკავება იგეგმება, რაც ხელისუფლებისთვის უფრო წამგებიანი იქნება”, – აცხადებენ „რეზონანსთან” უფლებადამცველები, რომელთაც ინფორმაცია აქვთ, რომ 20-21 ივნისის ღამით განვითარებულ მოვლენებთან დაკავშირებით კიდევ ბევრი აქციის მონაწილის დაპატიმრებას უნდა ველოდოთ.

ამ ღამით განვითარებულ მოვლენებთან დაკავშირებით შსს-ს სისხლის სამართლის პასუხისგებაში მიცემის კუთხით, ყველაზე სწრაფი სამოქალაქო პირების მიმართ აღმოჩნდა და კანონდამრღვევ ჯერჯერობით არცერთ სამართალდამცველს ბრალი წაყენებული არა აქვს. შსს-მ გვამცნო, რომ მხოლოდ 10 პოლიციელს და განსაკუთრებულ დავალებათა დეპარტამენტის უფროს გიორგი ყარაულაშვილს დროებით უფლება- მოსილება შეუჩერდათ.

20-21 ივნისის ღამით ჯგუფურ ძალადობაში ბრალდებულ 4 პირს ბრალი ოფიციალურად წაუყენეს, გამოძიება მათ სისხლის სამართლის 225-ე მუხლის მეორე ნაწილით გათვალისწინებულ დანაშაულს ედავება, რაც ჯგუფური მოქმედებაში მონაწილეობას გულისხმობს და კანონის თანახმად 4-დან 6-წლამდე ვადით პატიმრობას ითვალისწინებს.

ასევე, შინაგან საქმეთა სამინისტროს ინფორმაციით, მიდის მასალების და მტკიცებულებების შეგროვება, რომლის დამუშავების შემდეგ კიდევ რამდენიმე ადამიანის პასუხისმგებლობის საკითს არ გამორიცხავენ.

შსს-ს ცნობით, მიმდინარეობს ჯგუფურ ძალადობაში მონაწილე სხვა პირების იდენტიფიცირების პროცესი და “შესაბამისი მტკიცებულებებისა და სასამართლო განჩინების მოპოვებისთანავე, ეტაპობრივად გაგრძელდება შესაბამისი სამართლებრივი რეაგირება”, -აცხადებენ შინაგან საქმეთა სამინისტროში.

დაკავებულები არიან: ზურაბ ბუდაღაშვილი, კახაბერ კუპრეიშვილი, ცოტნე სოსელია, ბესიკ თამლიანი. ოთხივე მათგანს თბილისის საქალაქო სასამართლოს მოსამართლემ ქეთევან ჯაჭვაძემ წაინასწარი პატიმრობა შეუფარდა. დაკავებული პირებიდან ბრალს არცერთი აღიარებს.

პროკურატურის მიერ გავრცელებული ინფორმაციით, გამოძიება ასევე დაწყებულია 2019 წლის 20-21 ივნისს, რუსთაველის გამზირზე, პარლამენტის შენობის მიმდებარე ტერიტორიაზე მიმდინარე აქციის ცალკეული მონაწილეების მიმართ სამართალდამცავთა მხრიდან უფლებამოსილების შესაძლო გადამეტების ფაქტზე. თუმცა, ამ მიმართულებით მიმდინარე გამოძიების ფარგლებში საგამოძიებო ორგანოს ეჭვმიტანილები და ბრალდებულები გამოვლენილი ჯერჯერობით არ ჰყავს.

ასევე, 20-21 ივნისის ღამით განვითარებულ მოვლენებთან დაკავშირებით, შინაგან საქმეთა სამინისტროს თანახმად, გიგი უგულავა, ირაკლი ოქრუაშვილი და გია ბარამიძე გამოიკითხებიან სსკ-ის 225-ე მუხლით მიმდინარე გამოძიების ფარგლებში,

ოპოზიციის ერთ-ერთი ლიდერი, გიორგი ბარამიძე, 20 ივნისის მოვლენებთან დაკავშირებით სასამართლო წესით 6 ივლისს დაიკითხა. მისი დაკითხვა მაგისტრი მოსამართლის თანდასწრებით 2 საათის განმავლობაში გაგრძელდა. ბარამიძის თქმით, ის მოწმის სტატუსით დაიკითხა, თუმცა, თავად ის არ გამორიცხავს, რომ ხელისუფლებამ ოპოზიციის წინააღმდეგ დაწყებული პოლიტიკური რეპრესიები გააგრძელოს და ეს სტატუსიც შეცვალოს.

„ბუნებრივია, კითხვა ეხებოდა ყველაფერ იმას, რაც არის დაკავშირებული გავრილოვის სისხლიანი დარბევის ღამეს წინ რა უძღოდა, რა ხდებოდა, როგორ ჩამოვიდა და რატომ ჩამოვიდა და რატომ ჩამოიყვანა ივანიშვილის რეჟიმმა გავრილოვი საქართველოში.

“მიუხედავად ოპოზიციის და საზოგადოების გაფრთხილებისა, მიუხედავად იქ გამართული პროტესტისა, “ნაციონალური მოძრაობის” და სხვა პარტიების მხრიდან მეორე დღეს რატომ მიიყვანეს პარლამენტში. რატომ შეიყვანეს სხდომათა დარბაზში მიუხედავად ჩვენი გაფრთხილებებისა და რატომ აღმოჩნდა საქართველოს მტერი პუტინის ემისარი საქართველოს პარლამენტის თავმჯდომარის სავარძელში”-განაცხადა გია ბარამიძემ.

პოლიტიკური მოძრაობა „გამარჯვებული საქართველოს” ხელმძღვანელი ირაკლი ოქრუაშვილი საზღვარგარეთ იმყოფება და უახლოესი 2 კვირის განმავლობაში ვერ შეძლებს გამოძიების კითხვებს უპასუხოს. ამის მიუხედავად, საჭიროების შემთხვევაში, იგი მზად არის საქართველოში დაბრუნებამდე გამოძიებას დისტანციურად გასცეს პასუხები. ასეთ ვითარებაშიც, მისი მთავარი მოთხოვნაა, რომ გამოკითხვა მაგისტრი მოსამართლის თანდასწრებით გაიმართოს.

„ევროპული საქართველოს” წარმომადგენელი გიგი უგულავა გერმანიაში გაფრინდა. აეროპორტში ჟურნალისტებისთვის მიცემულ კომენტარში განაცხადა, რომ ამ საქმის „გამოძიების მიმართ ნდობა, ბუნებრივია, ნულოვანია”. ის დაკითხვაზე მაშინ მივა, როდესაც შინაგან საქმეთა მინისტრს გიორგი გახარიას დაიბარებენ.

დაკავებული ზურაბ ბუდაღაშვილის დედა მაგული გობეჯიშვილი „რეზონანსთან” ამბობს, რომ უსამართლობის გრძნობის გამო აქციებს გამართვას აპირებს და ადვოკატის მომსახურებაზე უარს ამბობს. მის შვილს ბრალი 4 ივლისს წაუყენეს. მაგული გობეჯიშვილი დეტალურად ყვება, როგორ მივიდა ზურა აქციაზე და ის რაც, შსს-ს მიერ გავრცელებულ კადრებში ჩანს, არის გაგრძელება, იმისა, რაც მანამდე ხდებოდა და შსს-ს არ უჩვენებია.

დედა ამბობს, რომ მისი შვილი აქციაზე შემთხვევით მივიდა. აქციაზე მისულმა კი ნახა, რომ მის გვერდით გოგონა წაიქცა, რომელსაც სპეცრაზმელმა ტყვია ესროლა. ამით გაბრაზებულმა ზურამ პოლიციელს ხელიდან ხელკეტის და ფარის წართმევა დაუპირა, რის გამოც ხელკეტს ფარზე ურტყამს. მას პოლიციესლის დაზიანება ან ცემა განზრახული არ ჰქონია.

„თუ დააკვირდებით, დაინახავთ, რომ ზურა ფარს არტყამს და არავინ დაუზიანებია და დაუზარალებია. ჩემი შვილი დაზარალდა. ორი ტყვია აქვს ნასროლი. ჩვენ არ მოგვითხოვია პასუხი ამაზე. გავჩუმდით და გვერდზე გავდექით”, – ამბობს მაგული გობეჯიშვილი.

არასამთავრობო ორგანიზაციების წარმომადგენლებს და უფლებადამცველებს კი 20-21 ივნისის ღამით განვითარებული მოვლენების გამოძიებასთან დაკავშირებით კითხვები აქვთ.

„რეზონანსთან” აცხადებენ, რომ ჯერ შსს და პროკურატურა მხოლოდ „სახელმწიფოს წინააღმდეგ” მიმართული დანაშაულის გამოძიებითაა დაკავებული და „არავინ საკუთარი რიგებიდან, არც პოლიტიკურად და არც სამართლებრივად ჯერ პასუხისგებაში არ მიუციათ.

მითუმეტეს, როდესაც მედიით გავრცელებულ კადრებში ზოგის იდენტიფიცირება ადვილად მოხდება. ისინი ფოქრობენ, რომ პროკურატურა და შსს ჩაერთვნენ კიდევ ერთხელ იმ თამაშში, რომელსაც წლებია ვუყურებდით. ისინი იქცნენ პოლიტიკურ ინსტრუმენტად ხელისუფლების ხელში.

GDI-ს ხელმძღვანელი გიორგი მშვენიერაძე მის ხელთ არსებული ინფორმაციით ამბობს, რომ „იგეგმება ათჯერ მეტი ადამიანის დაკავება, რაც იქნება ასევე კატასტროფული შეცდომა. მისი აზრით, ხელისუფლებამ შეიძლება აწარმოოს გამოძიება ამ საქმეზე, მაგრამ არანაირი აუცილებლობა არ არსებობს იმისთვის, რომ ეს ადამიანები საპატიმრო დაწესებულებებში აღმოჩნდნენ. მშვენიერაძე ამბობს, რომ ისედაც დაძაბულ სიტუაციას კიდევ უფრო გაართულებს.

„რაც ამ აქციის გამოძიების ირგვლივ ხდება, ეს არის შერჩევითი სამართალი. სახელმწიფო ცდილობს მთელი ბრალი დემონსტრანტებზე გადაიტანოს და თავის შეცდომებსა და დანაშაულზე რეაგირება არ აქვს.

სამწუხაროდ, რაც ინფორმაცია მაქვს, იგეგმება ათჯერ მეტი ადამიანის დაკავება, ეს კი ასევე კატასტროფული შეცდომა იქნება. ხელისუფლებას იმის იმედი აქვს, რომ მიტინგი პარლამენტის წინ მინელდა, ზაფხულია, ხალხი აღარ არის ქალაქში, დაიღალნენ ადამიანები და გადავტეხეთ პროტესტი წელში. ეს ასე არ არის. სხვაგან ამოყოფს თავს პროტესტი და უფრო მძიმედ ხელისუფლებისთვის, თუ ის ამ შეცდომას დაუშვებს”,-აცახდებს მშვენიერაძე.