დღე: ივლისი 12, 2019

გორელი ემიგრანტი, რომელიც სხვებს ეხმარებოდა, გარდაიცვალა

 ანო ემხვარი ფეისბუქში წერს გორელ ემიგრანტზე, ინგა ბერიანიძეზე, რომელიც უამრავ ადამიანს ეხმარებოდა, ბევრ გაჭირვებულს გაუწოდა ხელი, რამდენიმე დღის წინ გარდაიცვალა.

„ვიცი, რაც უნდა დავწერო, ვეღარაფერს შევცვლი, მაგრამ მე მაინც მინდა გიამბოთ ამ ქალბატონის შესახებ. ინგა ბერიანიძე, ქალბატონი, რომელიც რამდენიმე თვის წინ გავიცანი.ერთ-ერთი ჩემი ბენეფიციარისთვის თანხის გადმორიცხვა უნდოდა გერმანიიდან, თან ბოდიშებს მიხდიდა, მცირედია და მაპატიეო.

მას შემდეგ იშვიათად ყოფილა ბენეფიციარი, რომ მას თავისი “მცირედი” სიკეთე არ გაეკეთებინოს.ინგა, ადამიანი, რომელიც უცხო ქვეყანაში 1 წლის განმავლობაში უმძიმეს დაავადებას ებრძოდა, რამდენიმე დღის წინ გარდაიცვალა.

ადამიანი, რომელიც თავის მდგომარეობის მიუხედავად, საქართველოში უსახსრდ დარჩენილ ბავშვებს ეხმარებოდა. ადამიანი, რომელიც გერმანელ ემიგრანტებს ედგა გვერდით, ამხნევებდა, საკუთარ სახლში იფარებდა და აპურებდა.

ადამიანი, რომელიც იბრძოდა თავისი და სხვისი სიცოცხლისთვის. ადამიანი, რომელიც გარდაიცვალა, მაგრამ მისმა სიკეთემ გადაარჩინა ელენე, თორნიკე, გიორგი, ნარი. მინდა, ყველა იცნობდეთ ამ მადლიან გორელ ქალბატონს,რომლის სიკეთეც და ზრუნვაც მე არასდროს დამავიწყდება. ვიზიარებ მისი ოჯახის უდიდეს ტკივილს!”, – წერს ანო ემხვარი.

(რეზონანსი) 

„გავრილოვის ღამეს“ მიტინგის დარბევა სახელმწიფოს 190 ათასი ლარი დაუჯდა

თბილისის საკრებულოს ფრაქცია „ნაციონალური მოძრაობის“ წევრის, ლევან ხაბეიშვილის ინფორმაციით, 20-21 ივნისს მომიტინგეების დარბევა სახელმწიფოს ასობით ათასი ლარი დაუჯდა. მისივე თქმით, დარბევის ღამეს რეგიონებიდან გადმოსროლილი დამატებითი ძალების კვებასა და სასტუმროებზე ბიუჯეტიდან 190 ათასი ლარი დაიხარჯა. 27 ივნისს, გიორგი გახარიას პრესკონფერენციის პირდაპირი სატელევიზიო მომსახურების შესყიდვისთვის სამინისტრომ 14 000 ლარი გადაიხადა.

„ადამიანები რომლებიც ჩამოიყვანეს ჩვენს გასალახად, დასარბევად, თვალების დასათხრელად და თავების გასატეხად ჩვენ შემდეგ დავაპურეთ, საჭმელი ვუყიდეთ, ლანჩი ვუყიდეთ, წყალი ვუყიდეთ სასტუმროში გავუმასპინძლდით და ამის შემდეგ გახარიას რომ პირდაპირ ეთერში ეს ყველაფერი უტიფრად მოეყოლა, რომ თურმე კი არის სისხლიანი ჟანდარმი მაგრამ გადადგომას არ აპირებს, ამაში დამატებით კიდევ 14 ათასი ლარი გადავიხადეთ,“ – ამბობს ხაბეიშვილი.

წყარო: Newposts

ერთ თვეში სახელმწიფო საგარეო ვალი 71 მლნ დოლარით, ერთ წელიწადში კი 252 მლნ დოლარით გაიზარდა

2019 წლის 30 ივნისის მონაცემებით, საქართველოს სახელმწიფო საგარეო ვალმა 5.438 მილიარდ დოლარს (15.6 მლრდ ლარი) გადააჭარბა.

რაც წინა თვესთან შედარებით, 71 მლნ დოლარით, ხოლო გასული წლის ანალოგიურ პერიოდთან შედარებით, 252 მლნ დოლარით მეტია.

კერძოდ, 2019 წლის 31 მაისის მონაცემებით, საქართველოს სახელმწიფო საგარეო ვალმა 5.367 მილიარდ დოლარს (15,040 მლრდ ლარი) გადააჭარბა. 2018 წლის ივნისის მონაცემებით კი, სახელმწიფოს საგარეო ვალის მოცულობა 5,186 მლრდ დოლარს (12,714 მლრდ ლარს) შეადგენდა.

საქართველოს სახელმწიფოს ყველაზე მსხვილი კრედიტორები არიან: აზიის განვითარების ბანკი (ADB); მსოფლიო ბანკის განვითარების საერთაშორისო ასოციაცია (IDA) და რეკონსტრუქციისა და განვითარების საერთაშორისო ბანკი (IBRD).

კერძოდ, IDA -ს მიმართ ვალი 1.022 მლრდ დოლარია; IBRD-ის მიმართ სახელმწიფოს საგარეო ვალი 904,058 მილიონი დოლარია, აზიის განვითარების ბანკის (ADB)-ის 1,158 მლრდ დოლარი.

ავტორი:თაია არდოტელი