ეუთო/ოდირისა და ვენეციის კომისიების დასკვნის გათვალისწინება არა მხოლოდ ხელისუფლებას, არამედ ოპოზიციასაც მოუწევს… მთავარი კი ისაა, მოესწრება თუ არა საარჩევნო კოდექსისა და საარჩევნო ადმინისტრაციის შეცვლა წელს დაგეგმილ ადგილობრივ არჩევნებამდე – ასე აფასებს კონსტიტუციონალისტი ავთანდილ დემეტრაშვილი.
ეუთო/ოდირის და ვეენციის კომისიამ ხელისუფლების მიერ ინიცირებულ საარჩევნო კოდექსზე 26-გვერდიანი ერთობლივი დასკვნა გამოაქვეყნა. მათი შეფასებით, საარჩევნო კოდექსში ცვლილებებში აქამდე გაწეული რეკომენდაციები დაკმაყოფილებულია, თუმცა ბევრი ფუნდამენტური საკითხი ჯერ კიდევ მოუგვარებელი რჩება.
დოკუმენტში ნათქვამია, რომ ამ მიმართულებით, მეტად ყოვლისმომცველი და სისტემური რეფორმების გატარება ჯერ კიდევ აუცილებელია და ასევე აღნიშნულია, რომ დაინიცირებული სარჩევნო ცვლილებები უფრო მეტად მიმართულია არსებული პოლიტიკური კრიზისის დასაძლევად, ვიდრე კანონმდებლობის სრულფასოვან მიმოხილვაზე დაფუძნებული ფუნდამენტური ცვლილებებისკენ.
მმართველ პარიაში ამ დასკვნას პოზიტიურად აფასებენ. პარლამენტის ვიცე სპიკერის, არჩილ თალაკვაძის თქმით, საერთაშორისო პარტნიორების პოზიცია და ეს დასკვნები კანონპროექტების მიღების პროცესში აქტიურად იქნება განხილული.
„ეუდო/ოდირის და ვენეციის კომისიის დასკვნები არის პოზიტიური, რეკომენდაციებიც არის ძალიან კონსტრუქციული და საქმიანი. ჩვენი გუნდი პარლამენტში დიდი პასუხისმგებლობით ეკიდება საერთაშორისო პარტნიორების პოზიციას და ეს დასკვნები იქნება განხილული კანონპროექტების მიღების პროცესში.
„ეს დასკვნები კიდევ ერთხელ ადასტურებს, რომ „ქართულმა ოცნებამ“ სწორი ინიციატივები შეიტანა კანონპროექტში, რაც არის შეფასებული დადებითად და მოცემულია საქმიანი რეკომენდაციები, რასაც დიდი ყურადღებით განვიხილავთ პარლამენტში“, – აღნიშნა არჩილ თალაკვაძემ.
დემეტრაშვილის შეფასებით, საარჩევნო კოდექსში დაგეგმილი ცვლილებების შინაარსზე მეტად, დღეს უფრო მნიშნელოვანი ამ ცვლილებების განხორციელების ვადებია.
„მხოლოდ ზოგადი შეფასებით შემოვიფარგლები, რადგან საკმაოდ დიდი დოკუმენტია და მთლიანად ეხება საარჩევნო სისტემას, რომელმაც ხელი უნდა შეუწყობს თანამედროვე საარჩევნო რეფორმების განხორციელებას საქართველოში. ამიტომ, ყველა შენიშვნის და რეკომენდაციის გათავალისწინება, რომელიც დაიდო ეუთო/ოდირისა და ვენეციის კომისიების მიერ, მოუწევს როგორც ხელისუფლებას, ისე ოპოზიციას.
„რაც შეეხება შენიშვნებს, რომელიც ეხება ცესკოს თავმჯდომარისა და მისი წევრების არჩევის წესს, აქ მთავარია, როდის უნდა განხორციელდეს ეს ცვლილება – ადგილობრივი არჩევნების დროს, თუ მომავალ არჩევნებში. ცესკოს თავმჯდომარე თამარ ჟვანიას კიდევ აქვს გარკვეული ვადა იყოს ამ თანამდებობაზე, რასაც ოპოზიცია არ დათანხმდება“, – განაცხადა ავთანდილ დემეტრაშვილმა.
