„სტრატეგია აღმაშენებელი”, გრიგოლ ვაშაძე, „რესპუბლიკელები” და „რეფორმატორები” ახალ პოლიტიკურ გაერთიანებას ქმნიან სახელით „მესამე ძალა”. პოლიტოლოგ დავით ზურაბიშვილის აზრით, აღნიშნული გაერთიანების მიზანი იმ ამომრჩევლის მხარდაჭერის მოპოვება უნდა იყოს, რომელიც არც „ოცნებას” და არც „ნაცმოძრაობას” აძლევს ხმას, თუმცა, მისივე თქმით, იმ ფონზე, როდესაც „მესამე ძალის” ფუნქცია გიორგი გახარიას პარტიას აქვს შეთავსებული, აღნიშნული გაერთიანების პერპექტივები ბუნდოვანია.
საკითხზე, თუ რა პერსპექტივა აქვს და რა მოტივით შეიქმნა გაერთიანება „მესამე ძალა” პოლიტოლოგი დავით ზურაბიშვილის თქმით, გაერთიანების მიზანი გასაგებია, თუმცა შეძლებენ თუ არა ამომრჩევლის გულის მოგებას – ეს სხვა საკითხია.
„გაერთიანების მიზანი იქნება ის, რომ გავიდნენ იმ ამომრჩეველზე, რომელსაც არც ეს ხელისუფლება მოსწონს და ალტერნატივად არც „ნაცმოძრაობას” განიხილავს. რამდენად მიაღწევენ ამას – ეს მეორე საკითხია, რადგან 2020 წლის არჩევნებში ყველა ეს ადამიანი საკმაოდ ახლო ურთიერთობაში იყო „ნაცმოძრაობასთან” – ერთიანი ფრონტით გამოდიოდნენ პრაქტიკულად.
„რამდენად ექნებათ მათ იმის დრო, რომ მოასწრონ სხვა ტიის ამომრჩევლის გულის მოგება, არ ვიცი, თუმცა, თავისთავად, მიზანი გასაგებია.
„შეიძლება ცოტა დაგვიანებულია ასეთი გაერთიანების შექმნა, თუმცა ამ გაერთიანების გარეშე ყველა მასში შემავალ პარტიას და პოლიტიკოსს პენსიაზე გასვლა, ან „ნაცმოძრაობის” უმცროს პარტნიორებად დარჩენა მოუწევთ
„ამიტომ გაერთიანების შექმნა საბოლოო ჯამში სწორი გზაა, თუმცა, რამდენად შეძლებენ თავის დამკვიდრებას – ეს სხვა საკითხია, რადგან მესამე ძალის ფუნქცია უკვე გახარიას პარტიამ შეითავსა,” – ამბობს დავით ზურაბიშვილი.
