ვაქცინაციის პროცესის დამუხრუჭების გამო, ძლივს გახსნილ ეკონომიკას ახალი საფრთხე ელის

ვაქცინაციის პროცესის დაგვიანებამ მოლოდინი მკვეთრად გააუარესა როგორც ჯანდაცვის სექტორში ასევე ეკონომიკაშიც, რომელიც პანდემიის მძევალი აღმოჩნდა. ბიზნესმენები შიშობენ, რომ შეიძლება ისევ ლოქდაუნიკენ წავიდეს ქვეყანა. იმ ფონზე, როცა მთელი მსოფლიო ვაქცინაციის პროცესშია ჩართული და ფაქტობრივად, კორონავირუსის დამარცხების ეტაპზეა, ამ პროცესს ფეხი ვერ აუწყო საქართველომ, რომელსაც ეპიდემიასთან ბრძოლაში დიდი ჩამორჩენა აქვს.

დაგვიანებული ვაქცინაცია სერიოზულ პრობლემას შეუქმნის ეკონომიკურ სუბიექტებს,  მთლიანად ჯანდაცვის სექტორს და მოსახლეობას, რომელიც ყოველდღიურად ეპიდემიას ეწირება. ასე ფიქრობს ბიზნესმენი დავით ბეგიაშვილი, რომელმაც ,,რეზონანსთან“ განაცხადა, რომ დიდი რისკია, ეპიდემიის მასშტაბები გაიზარდოს და რეგულაციების მოხსნის ნაცვლად, ისევ ლოქდაუნის საჭიროება დადგეს.

,,ჩვენისთანა მცირე ეკონომიკის მქონე ქვეყნისთვის ვაქცინაციის დაგვიანება საკმაოდ მძიმე შედეგს მოიტანს. ცალკე ვერც ერთ დარგს ვერ გამოვყოფ, ყველა მიმართულებით პრობლემას ველით. დიდი რისკის წინაშეა ქვეყანა იმ ის გამო, რომ ვაქცინაციის საკითხი სახელმწიფომ ვერ მოაგვარა. ეკონომიკაზე ეს ზოგადად ცუდად მოქმედებს, იწვევს პანიკასაც და ბიზნესის მდგომარეობაზეც უარყოფითად აისახება.

ვხედავ რისკს, რომ შეიძლება ისევ ლოკდაუნი დასჭირდეს ქვეყანა. ყველამ ერთობლივად უნდა მიიღოს ამ პროცესში მონაწილეობა, ვის რა რესურსი აქვს. თუ აუცილებელი გახდა, ჩართონ  კომერციულ სტრუქტურებიც და დართონ ნება, შემოიტანონ ვაქცინა. ადამიანების ჯანმრთელობა საფრთხეშია, სიკვდილ-სიცოცხლის საკითხია.

რაც ხდება,  არაპროფესიონალიზმის ბრალია და საბოლოო ჯამში, ზარალდება მთელი ეკონომიკა და ბიზნესი. ვერავინ პროგნოზს ვერ აკეთებს, რადგან გაურკვევლობაა. ეს ყველაფერი ერთმანეთთან პირდაპირ კავშირშია. ცხადია,  რისკის ქვეშაა ეროვნული ვალუტაც, მრავალი კუთხით პრობლემა გვაქვს იმის გამო, რომ ვაქცინაციის პროცესი გვიანდება“, – განაცხადა ბეგიაშვილმა.

ეკონომისტების შეფასებით, საქართველო გლობალურ პროცესებს ჩამორჩა. როგორც ანალიტიკოსმა ზურა კუკულაძემ აღნიშნა, ტურიზმს, საავიაციო ბიზნეს, ავტოიმპორტს თუ სამშენებლო სექტორს – ყველა ეკონომიკურ მიმართულებას დიდი პრობლემა ელის იმის გამო, რომ ვაქცინის შემოტანა დაგვიანდა.

,,რეგულაციები, რაც მოქმედებს ქვეყანაში, უახლოეს დღეებში თითქმის სრულად უქმდება. ამ დროს არ გვაქვს ვაქცინა, რაც ეპიდემიურ მდგომარეობას დაამძიმებს. ჩვენ თუ აქცენტს ვაკეთებთ შემომყვან ტურიზმზე, პანდემიის მიმართ ფეთქებადსაშიშ სიტუაციას ყველა მოერიდება. ცხადია, საფრთხეშია ბიუჯეტიც, რომელსაც მკურნალობისა და სხვა საჭიროებებისთვის ხარჯი მოემატება.

აშკარაა, რომ ვაქცინის შემოტანა-არშემოტანას აქვს სუბიექტური და ობიექტური მიზეზები, ჯანდაცვის მენეჯმენტის საკითხია, ვერ დავიწყებ განმარტებას, რატომ ვერ ერევა. კონკრეტულ დარგებს თუ ჩამოვყვებით, ყველას შეიძლება პრობლემა შექმნას – ნებისმიერ ეკონომიკურ სუბიექტს – რიგითი ფერმერებიდან სხვილი ბიზნესის ჩათვლით, ყველა ზარალდება იმის გამო, რომ ვერ შემოდის ვაქცინა“, – აღნიშნა კუკულაძემ ,,რეზონანსთან“.

ცხადია, ვაქცინაციის პრობლემა ხელს უშლის ბიზნესს კონკრეტული საქმიანობის განხორციელებაში. განსაკუთრებით იმ ნაწილს, რომელიც ევროპულ ბაზრებთანაა დაკავშირებული. ასეთია ავტოიმპორტიორები. მათ უკვე ევროპაში დაწესებული სტანდარტის დაკმაყოფილება უჭირთ.

,,არის ქვეყნები, რომლებიც 72-საათიან ,,პისიარ” ტესტებზე უარს ამბობენ და არ იღებენ მოქალაქეებს, რომლებსაც ასეთი ტესტი გავლილი აქვთ. უკვე 4-5-საათიან ,,პისიარ” ტესტებს ითხოვენ. ამიტომ სწრაფად უნდა მოხდეს ვაქცინაცია, რის გარეშეც ნორმალურად მუშაობა შეუძლებელი ხდება. როგორც კი ეს საკითხი დალაგდება, ეკონომიკის აღმასვლა დაიწყება.

უკვე ძალიან ბევრი ბიზნესი გაკოტრდა. ესენი არიან ძირითადად მცირე და საშუალო კომპანიები, რომლებიც რთულ ვითარებაში აღმოჩნდნენ. ერთი წამითაც არ შეიძლება დაგვიანება, ყველგან უარესდება მდგომარეობა. როგორც კი  ვაქცინაცია დაიწყება, ერთ-ერთი სამიზნე ჯგუფი უნდა გახდეს ევროპის მიმართულებით მომუშავეები, რადგან ვისაც უშუალოდ უხდება ევროპაში მოგზაურობა, მათი დროული აცრა აუცილებელია“, – განუცხადა ავტოიმპორტიორმა ელგუჯა ჯამაგიძემ ,,რეზონანსს“.

ამდენად, დიდია საფრთხე, რომ რეგულაციების სრულად მოხსნის შემდეგ ინფიცირების ყოველდღიური მაჩვენებელი ისევ გაიზარდოს.  ვაქცინის შემოტანის კონკრეტული თარიღიც ჯერჯერობით ისევ  უცნობია. ამასობაში, ახალი შტამების გავრცელების გამო, მსოფლიო მესამე ტალღის საშიშროების წინაშეა. საქართველოს შესაძლებლობები ეპიდემიასთან ბრძოლაში კი უფრო და უფრო მცირდება.

About The Author